A Sección Sindical UGT do Comité de Empresa de EOS España, SLU denuncia publicamente a alarmante e continua perda de emprego que está a levar a cabo EOS España, SLU na súa sede da Coruña desde hai varios meses. Segundo os datos recompilados pola devandita Sección Sindical, elimináronse 20 postos de traballo no último ano, o que supón un grave impacto para as persoas traballadoras e as súas familias.

Estamos a presenciar un desmantelamento encuberto da forza laboral na Coruña. A empresa EOS España, SL, está a empregar diversas estratexias para reducir o seu persoal sen intentar recolocar ao persoal, a maioría dos cales levan moitos anos de servizo na empresa. Non se trata dunha reestruturación; é unha destrución sistemática de empregos na nosa cidade.

A Sección Sindical UGT do Comité de Empresa de EOS España, SLU acusa á dirección de EOS España, SLU de falta de transparencia e de non informar nin negociar cos representantes das persoas traballadoras sobre as medidas que están a aplicar. Esta Sección Sindical solicitou en repetidas ocasións información detallada sobre os plans da empresa, pero non recibiu respostas satisfactorias.

A situación está a xerar unha gran incerteza e preocupación entre o persoal de EOS España, SLU. A Sección Sindical UGT do Comité de Empresa de EOS España, SLU esixe á dirección da empresa que pare a destrución de empregos e que se abra un verdadeiro proceso de negociación cos representantes das persoas traballadoras para buscar alternativas que garantan o mantemento do emprego e o futuro dos centros de traballo na Coruña.