As patronais teñen que saber que seguiremos apoiando folgas e conflitos sectoriais e de empresas ao longo e ancho do país, motivados pola cerrazón e avaricia do empresariado, en defensa dos nosos convenios colectivos e dos nosos salarios.

As empresas continúan repercutindo a subida do IPC aos prezos dos seus produtos cargando todo o peso da inflación na cidadanía, aproveitando a alza para elevar tamén a marxe de beneficio por unidade produtiva, provocando con iso un forte efecto de segunda rolda tanto na inflación subxacente, 5,5%, como na xeral, 10,2%.

Ante esta situación, temos que seguir mobilizando para conseguir que os convenios garantan o poder adquisitivo dos salarios coas imprescindibles cláusulas de garantía salarial.

A inflación avanzada do mes de xuño déixanos unha subida do 1,8%, e coloca a subida dos prezos nun 10,2% interanual e a inflación subxacente nun 5,5%. Os preocupantes datos veñen ratificar a necesidade de fortalecer o desenvolvemento da negociación colectiva, no que a protección do incremento dos salarios, determinantes para o sustento e a dignidade da cidadanía, garántase con cláusulas de revisión salarial para manter o poder de compra das persoas traballadoras e, con iso, unha vida digna. Esixencia que non só é de xustiza, senón que é fundamental para manter a economía e o emprego.

Por outra banda, consideramos que o Goberno ten que apostar por medidas que conteñan os prezos, dunha forma especial os dos produtos de consumo básicos, e abordar políticas centrais redistributivas, como a fiscalidade, desde a negociación e o acordo no ámbito do diálogo social, ausentes na inquietante situación que atravesamos.

As medidas adoptadas polo Goberno camiñan na dirección correcta; sen embargo, cremos que unhas non son suficientes e outras non están a ter o efecto previsto. En todo caso, si tiveron un impacto positivo na contención dos prezos do gas e a electricidade, pero non serviron para frear as da gasolina e carburantes en xeral, polo que fai falta tomar medidas de contención de prezos que eviten que as subvencións efectuadas polo Goberno acaben sendo absorbidas polas grandes petroleiras, como está a ocorrer, en lugar de repercutir no benestar da cidadanía.

Non nos imos a resignar ante este escenario, onde o empresariado deste país pretende facer recaer sobre a clase traballadora o custo da crise de prezos xerada pola subida dos prezos enerxéticos, e agravada coa guerra de Ucraína.

Por iso,  imos dar a batalla para garantir o poder adquisitivo dos salarios.