Amplo seguimento na segunda xornada de folga convocada, para este xoves, día 14, na sanidade privada da provincia da Coruña. Lembrar que UGT, xunto con CCOO e CIG, convocaron dúas xornadas de folga neste sector os días 30 de novembro e 14 de decembro.
Dende UGT Servizos Públicos denúnciase o bloqueo do convenio por parte da patronal, o que está a afectar a máis de 4.000 persoas na provincia da Coruña. Pese a que o sector xa conta cun convenio á baixa, a patronal aínda pretende recortar máis, presentando unha oferta económica ridícula e recortar dereitos como as contías dos trienios ou o cobro do 100 por cento no caso de baixas.
Os sindicatos non van renunciar a estes dereitos e reclaman outros como cobrar polo traballo os domingos.
O último movemento da patronal foi suspender as negociacións alegando un posible incremento do SMI ou unha posible modificación lexislativa da xornada máxima legal pero os traballadores e traballadoras do sector consideran que son excusas e demandan seguir negociando unhas condicións laborais dignas e poñer fin ao recorte de dereitos.