Con motivo do Día Internacional da Muller, que se celebra o 8 de marzo, UGT e CCOO publicaron un manifesto baixo o lema 8M, Igualdade ou Conflito. UGT e CCOO activas pola igualdade efectiva no traballo.

Nela, valoran o incremento do SMI ata os 1.080 euros e aseguran que se trata dunha "medida imprescindible que reducirá a brecha de xénero e que podería beneficiar ao 14,5% do conxunto das persoas asalariadas" e permitirá "reducir aínda máis a brecha salarial existente" xa que “as mulleres seguen tendo salarios máis baixos en xeral e ocupan sectores moi afectados polo SMI”.

Ambos sindicatos denuncian que seguen sendo as mulleres as que traballan a tempo parcial e as que asumen a maioría das excedencias por coidados. Subliñan que, a pesar dos avances legais, "é imprescindible" que se abonen estes permisos e se avance noutras políticas e medidas de corresponsabilidade.

Así mesmo, insisten na necesidade de promover medidas de igualdade na negociación colectiva, esixir o cumprimento dos plans de igualdade, loitar contra a violencia de xénero no ámbito laboral, aumentar e mellorar as políticas activas de emprego e adoptar políticas con perspectiva de xénero e de plena igualdade nos dereitos das traballadoras do fogar. 
Ambos os sindicatos reclaman investir en educación en igualdade; que se garanta o dereito ao aborto, sen ningún tipo de coacción; e reforzar e garantir os instrumentos e recursos de vixilancia, control e sanción da Autoridade Laboral para o cumprimento efectivo do principio de igualdade no traballo.

Ante a violencia machista, a misoxinia, o racismo, a LGTBIfobia e o sexismo que afecta ás mulleres, instan a unir "neste 8M as nosas voces xunto co movemento feminista nacional e internacional".

O manifesto conclúe cun chamamento ás traballadoras para que participen, activamente, nos diferentes actos unitarios para demostrar “a forza do feminismo e o seu potencial transformador no ámbito político e no diálogo social”.

Os actos previstos na nosa comarca son os seguintes:

► Manifesto conxunto