Segundo os datos definitivos facilitados polo Ministerio de Traballo e Economía Social relativos aos accidentes de traballo do ano 2022, morreron 864 persoas (68 en Galicia).

Se desglosamos os datos facilitados:

• Cada día morreron 2 persoas en accidente de traballo.
• 1.790 sufriron un accidente con baixa.
• Producíronse 3.338 accidentes, dos cales 11 foron graves. 
• Con respecto ao ano anterior, en 2022 os accidentes laborais aumentaron un 4,46%, un 8,7% dos que causaron baixa, e faleceron 864 persoas, 122 persoas máis, o que supón un incremento do 16,4%. 
• O perfil do accidentado en 2022: é un home, menor de 34 anos e que traballa en obras estruturais ou como condutor de vehículos de transporte urbano ou por estrada. 

Estes datos reflicten que as empresas seguen incumprindo a normativa de prevención de riscos laborais (no 37% dos casos non se realizara a avaliación de riscos laborais esixida pola lei e 224 foron accidentes mortais) e que existe un déficit na xestión preventiva. Así mesmo, obsérvase que os asalariados con contrato temporal rexistran unha incidencia 1,5 veces superior ás personas traballadoras con contrato indefinido.

A seguridade e saúde laboral, un dereito fundamental

Necesítanse con urxencia solucións para facer efectivo o dereito fundamental das persoas traballadoras a uns ambientes de traballo seguros e saudables. UGT insta a seguir reducindo a precariedade laboral e avanzar cara a empregos decentes e libres; poñer fin á externalización masiva da xestión preventiva; reforzar os recursos da Inspección de Traballo; revisar e actualizar a Lei de Prevención de Riscos Laborais (non só para adaptala á nova realidade do mundo laboral, senón para acadar unha maior cultura preventiva) e o Regulamento dos Servizos de Prevención (RSP), para promover a calidade na súa xestión ( hai que corrixir a sobrecarga de traballo dos técnicos pertencentes a estas empresas, a falta de independencia por presións e intereses, etc.)

Os partidos políticos teñen que ter un compromiso de facer da seguridade e saúde no traballo unha prioridade na súa axenda. Cómpre abrir, canto antes, unha mesa de diálogo social sobre este asunto (un compromiso do goberno de coalición paralizado polo adianto electoral) e un plan de choque negociado cos axentes sociais, que facilite a redución do incidencia de riscos psicosociais e trastornos musculoesqueléticos.

Así mesmo, debería crearse, a nivel estatal, unha figura similar á do delegado territorial de Prevención de Riscos Laborais para mellorar a prevención de riscos laborais nas pemes, onde non existe representación sindical. É un feito que os lugares de traballo sindicalizados son lugares de traballo máis seguros.

Riscos psicosociais de orixe laboral, os peor xestionados nas empresas

301 traballadores faleceron en 2022 por infartos e ictus, patoloxías que poderían estar relacionadas coa presenza de riscos psicosociais de orixe laboral (son 57 persoas máis que en 2021).

Segundo os datos do INE en España, a depresión severa afecta a 230.000 persoas e o pasado ano suicidáronse 4.097 persoas, un 2,1% máis que en 2021 (unha cifra que non para de crecer). Como reflexo destes problemas de saúde mental, indicar que os hipnosedantes, entre eles tranquilizantes e somníferos, son a terceira substancia máis consumida, despois do alcol e do tabaco, segundo os últimos datos da Enquisa de Idade 2019-2020 (Enquisa sobre alcol, drogas e outras adiccións en España Modulo Laboral).

Precísase máis investimento

Existe un baixo investimento das empresas en prevención de riscos laborais, posto que seguen vendo a prevención como un custo, non como un investimento. A Comisión Europea sinala que, por cada euro investido en saúde e seguridade no traballo, o beneficio que obtén o empresario é máis ou menos o dobre. Polo tanto, investir en prevención e cumprimento da normativa non é só unha obriga moral e legal, tamén é un beneficio para a propia empresa, para as persoas traballadoras e para o conxunto da sociedade.

Así mesmo, é necesario un maior investimento das Administracións Públicas naquelas organizacións implicadas na prevención de riscos laborais, e máis recursos para reforzar a Inspección de Traballo e a Fiscalía de Saúde Laboral. Trátase de acabar coa impunidade de moitos accidentes laborais. Esta Fiscalía debería poder actuar na orde social.

Informe UGT sobre accidentes de traballo 2022