Os datos de paro rexistrado publicados hoxe polo Servizo Público de Emprego (SEPE) mostran un novo descenso do desemprego no mes de maio, concretamente de 1.966 persoas con respecto a abril. Tras varios meses consecutivos de caída, o número total de persoas desempregadas sitúase en 54.119. Con respecto ao ano anterior, o paro tamén se reduciu en 3.730 persoas.

Un mes máis, a Unión Xeral de Traballadoras e Traballadores sinala que os datos de contratación confirman o punto de inflexión que supuxo a reforma laboral na calidade de vida das persoas traballadoras. O número de contratos indefinidos elévase en maio en 8.952 contratos, supoñendo o 32,97% do total de contratos rexistrados, que ascende este mes a 27.151.

Para UGT Coruña e Cee, é indubidable o impacto positivo que está a ter a reforma laboral para as relacións laborais do noso país, introducindo os incentivos necesarios para acabar coa fraudulenta temporalidade que implicaba a concatenación de contratos de moi curta duración e reducindo a inestabilidade laboral que sufrían miles de persoas nos seus postos de traballo. Agora que o contrato indefinido converteuse na modalidade de referencia para a contratación, é o momento de ampliar as súas garantías e continuar protexendo os dereitos das persoas traballadoras, acabando de rematar aquelas cuestións que quedaron sen resolver, como a reforma das causas e o custo do despedimento.

Tendo en conta o contexto actual, UGT ten claro que o benestar da poboación traballadora non pode depender dos vaivéns electorais. Por iso, o sindicato insta aos poderes públicos a que sigan traballando na mellora da xustiza social, pois é evidente que as políticas levadas a cabo ata o de agora demostraron ser amplamente eficaces impulsando a recuperación da economía e o progreso social grazas á creación de emprego digno e de calidade.

Datos principais

- En maio rexistráronse un total de 54.119 persoas en situación de desemprego, 1.966 persoas menos que o mes pasado. En termos anuais, o paro baixou en 3.730 persoas (- 6,89%).

- Neste mes hai 1.030 mulleres menos rexistradas como paradas con respecto a abril, e 936 homes menos. En termos anuais, o paro feminino baixou en 1.934 mulleres e o masculino en 1.796 homes. As mulleres representan o 58,89% das persoas desempregadas.

- O número de mozos e mozas inscritos como desempregados ascendeu a 2.040 en maio, o que supón un descenso de 186 persoas menos desempregadas que en abril. En termos interanuais, o desemprego entre os menores de 25 anos descendeu un 8,57 % (175 mozos desempregados menos).

- Respecto das persoas traballadoras estranxeiras na Coruña, o número de parados rexistrados descende en maio en 120 persoas; chegando a un total de 3.847 persoas estranxeiras desempregadas. En termos anuais obsérvase un aumento do 4,6 %, o que supón 177 persoas estranxeiras desempregadas máis.

- Respecto ao mes anterior, a información por sectores amosa un descenso de 1.966 persoas paradas, 1.460 persoas no sector servizos, 219 persoas na industria, 161 persoas no sector da construción, no agro 36 persoas e no colectivo sen emprego anterior en 90 persoas.

- O número de persoas afiliadas á Seguridade Social aumentou en 3.492  persoas en marzo, ata alcanzar unha media de 458.426 afiliados.

- O volume de contratos totais diminúe en termos anuais nun 10,18%, os temporais fano nun 4,45 % e os indefinidos nun 19,93%. O peso dos traballadores fixos de maio sobre o total dos contratos sitúase neste mes no 32,97%.