A Unión Xeral de Traballadores e Traballadores anima á cidadanía a participar nas máis de 70 mobilizacións que terán lugar por todo o país o vindeiro primeiro de maio, Día Internacional do Traballo, convocadas baixo o lema: "Polo pleno emprego: menos xornada, mellores salarios".

Un 1º de Maio para defender o gañado ata agora e continuar avanzando en novos retos laborais e sociais. O sindicalismo é un piar transformador das democracias en todo o mundo, por iso a nosa loita é transversal e transfronteiriza.

O Diálogo Social conseguiu grandes fitos en materia xurídico-laboral en España nestes últimos anos, garantindo dereitos que debían recoñecérselle á clase traballadora e que hoxe en día seguen dando os seus froitos. Debemos recoñecer o valor que supuxo a reforma laboral de 2021 no mercado de traballo e a aposta pola suba dos salarios.

Necesitamos unha aposta decidida polo PLENO EMPREGO.

Neste primeiro de maio queremos abordar unha serie de reivindicacións que o sindicato quere resolver canto antes, e desa forma acadar o pleno emprego.

Necesitamos mellorar o marco regulador no que se xere o emprego do futuro. É o momento da redución legal da xornada de traballo, dunha mellor regulación da contratación a tempo parcial e da extensión dos contidos da chamada lei rider ao conxunto da economía de plataforma.

É hora de protexer o contrato de traballo cunha nova regulación do despedimento que respecte os compromisos internacionais adquiridos polo noso país a través da Carta Social Europea. É vital protexer as persoas que xeran a verdadeira riqueza no noso país coa súa forza produtiva: a clase traballadora. 

Asuntos pendentes para 2024 

O noso país debe aspirar a constituírse nun polo industrial aproveitando o potencial da enerxía renovable a prezo competitivo e que xere emprego de calidade.

É o momento de despregar unha potente estratexia de coidados no marco dunha recuperación do conxunto dos servizos públicos e de atención á cidadanía. No marco da Estratexia de coidados, é esencial culminar o desenvolvemento do sistema de atención á dependencia, necesidade social e xacemento de emprego, maioritariamente feminino, que debe ser de calidade, recoñecido socialmente e ben remunerado.

É fundamental protexer as persoas traballadoras que se encontran en situacións de vulnerabilidade e son vítimas de discriminación laboral por mor da súa raza, sexo, xénero, identidade ou discapacidade, entre outros factores. Esta discriminación non só atenta contra os dereitos fundamentais dos individuos, senón que tamén socava os principios básicos de igualdade e xustiza no ámbito laboral.

O dereito á vivenda segue sendo unha materia pendente no noso país. Unha xuventude que comparte pisos, un alugueiro aínda demasiado alto para os salarios da maioría. Cómpren políticas públicas valentes, cunha aposta clara pola promoción e un parque público de vivenda de alugueiro.

› Manifesto de UGT e CCOO para o Primeiro de Maio