Os datos do IPC de maio, publicados hoxe polo INE, sitúan a inflación anual da nosa provincia no 3,1%, 2 décimas menos que en abril (3,2% en datos estatais, 9 décimas menos que en abril). Así, continúa a desescalada do nivel xeral de prezos como consecuencia da paulatina moderación dos mercados enerxéticos. Pola súa banda, a taxa subxacente, que reflicte a inflación do compoñente estrutural, descendeu en menor medida, 5 décimas menos que o mes anterior, ata alcanzar unha variación anual do 6,1%. A pesar deste descenso, seguen rexistrándose niveis elevados debido á subida persistente dos prezos dos alimentos. Así, neste mes destaca o incremento anual de produtos básicos como azucre (46,3%), manteiga (25,2%), aceite de oliva (24,7%) ou leite (23,6%).

Isto demostra como parte do tecido empresarial segue mantendo altas marxes de beneficio, aproveitando a falta de competencia e poder de mercado nalgúns sectores para fixar prezos desorbitados, como vimos denunciando dende UGT. Así o alertaron tamén institucións como o Banco Central Europeo ou o Banco de España, sumando recentemente á lista a propia OCDE, que no informe semestral de perspectivas económicas presentado a semana pasada sinalaba a España como o país onde foron as que máis marxes comerciais contribuíron ao aumento da inflación.

Por iso, é necesario tomar medidas que poñan freo aos grandes beneficios rexistrados por algunhas empresas que están a presionar os prezos, reequilibrando así o custo da crise inflacionista, que ata agora recaía case na súa totalidade sobre os ombreiros da clase traballadora. O anunciado Observatorio das marxes empresariais debería converterse nunha ferramenta útil para ofrecer transparencia sobre o comportamento das empresas na formación de prezos, facilitando así o deseño de políticas públicas que aborden eficazmente os brotes inflacionistas e promovan unha mellor distribución da renda.

Por último, cómpre lembrar que as subas salariais pactadas no que vai de ano (3,3% de media) seguen a situarse por debaixo da inflación media (actualmente no 4,5%). En consecuencia, cómpre trasladar os incrementos pactados na nova AENC 2023-2025 aos convenios colectivos pendentes de sinatura, que para este ano establece un incremento do 4% cunha cláusula de revisión dun 1% adicional, protexendo así o poder adquisitivo dos traballadores. familias e contribuíndo así a potenciar o consumo e a senda de crecemento económico do noso país.