As condicións laborais teñen unha enorme influencia sobre a saúde das persoas traballadoras. Desde os sindicatos vimos desde hai anos denunciando que a precariedade laboral enferma e mata.

A pesar da inclusión das contornas laborais seguras e saudables entre os principios e dereitos fundamentais no traballo da Organización Internacional do Traballo, en España aínda estamos lonxe de alcanzar este fito. De feito, atopámonos nun momento crítico para a saúde e seguridade do traballo no noso país.

En 2022 contabilizáronse en España case 1.200.000 accidentes de traballo, aumentando nun 5% respecto a 2021 e producíronse 826 mortes no traballo, 121 máis que o ano anterior e que aumentarán de maneira notable cando se publiquen os datos definitivos. Son cifras inaceptables para unha sociedade como a nosa, ás que se debe poñer freo de maneira inmediata. Ademais, as enfermidades de orixe laboral seguen ocultándose, enquistándose como a eterna materia pendente da prevención de riscos laborais. Na nosa provincia, o número de accidentes de traballo con baixa, en xornada e in itinere foi de 12.609 (dos cales 22 foron mortais), un número inferior con respecto a 2021, pero seguramente aumentará de maneira notable cando se publiquen os datos definitivos.

A día de hoxe, as consecuencias dos accidentes e as enfermidades relacionadas co traballo, supoñen un grave problema social que leva aparellados enormes custos humanos e económicos. Pero un problema ao que as administracións non lle prestan a atención necesaria por parte daquelas que poderían actuar para evitalo. Un problema invisible.

Desde UGT levamos longo tempo denunciando a enorme infradeclaración das enfermidades profesionais e máis concretamente, dos cancros de orixe laboral, entre os que se atopan aqueles causados polo amianto.

Neste sentido, reivindicamos máis ambición e valentía aos Gobernos para protexer a seguridade e saúde das persoas traballadoras sen ambaxes, para que non prevalezan criterios económicos sobre criterios de protección da saúde no ámbito laboral á hora de lexislar, e concretamente reclamamos, unha redución do valor límite de exposición ao amianto na contorna laboral, porque non hai valor seguro. Opoñémonos rotundamente ao valor proposto polo Consello Europeo porque é un límite de exposición ao amianto dez veces superior ao recomendado polos expertos en saúde laboral, o que supoñerá máis mortes de persoas traballadoras por este motivo.

Existen tamén outras cuestións ás que se debe facer fronte no ámbito preventivo; as transicións dixital, demográfica e ecolóxica, e a protección da saúde mental das persoas traballadoras.

É imperativo avanzar na incorporación da perspectiva de xénero na seguridade e a saúde no traballo, facilitar a conciliación entre a vida persoal, familiar e laboral e feminizar a listaxe de patoloxías e profesións do RD de enfermidades profesionais, así como no resto de materias de prevención. Só así poderemos reverter as desigualdades de xénero presentes na prevención de riscos laborais. Con todo, os maiores retos aos que nos enfrontamos son: conseguir que as empresas cumpran rigorosamente coa normativa en materia de prevención de riscos laborais; internalizar a xestión preventiva nas empresas; e acabar co transvasamento de patoloxías profesionais ao Sistema de Seguridade Social.

► Manifesto conxunto de UGT e CCOO